മലപ്പുറം: തെരുവുനായയുടെ കടിയേറ്റതിനെ തുടര്ന്ന് പ്രതിരോധ കുത്തിവയ്പെടുത്തിട്ടും പേവിഷബാധയേറ്റ ആറുവയസുകാരി മരിച്ചു.
കഴുത്തിന് മുകളിലേക്കേറ്റ പരിക്ക് ഗുരുതരവും ആഴത്തിലുള്ളതുമായതിനാലാണ് വാക്സിൻ ഫലപ്രദമാകാത്ത സാഹചര്യം ഉണ്ടായതെന്ന് ആരോഗ്യവിദഗ്ധർ പറയുന്നു.
പെരുവള്ളൂര് കാക്കത്തടം സ്വദേശി കെ സി സല്മാനുല് ഫാരിസിന്റെ മകള് സിയ ഫാരിസാണ് (6) മരിച്ചത്.
കോഴിക്കോട് ഗവ. മെഡിക്കല് കോളജ് ആശുപത്രിയില് തീവ്രപരിചരണ വിഭാഗത്തില് ചികിത്സയിലിരിക്കെ ഇന്നു പുലര്ച്ചെയാണ് മരിച്ചത്.
മാര്ച്ച് 29നാണു സിയ അടക്കം ആറു പേര്ക്കു പട്ടിയുടെ കടിയേറ്റത്. രണ്ടു മണിക്കൂറിനകം തന്നെ കോഴിക്കോട് മെഡിക്കല് കോളജിലെത്തി പ്രതിരോധ കുത്തിവയ്പെടുത്തിരുന്നു.
എല്ലാ ഡോസും പൂര്ത്തിയാക്കിയെങ്കിലും മുറിവെല്ലാം ഉണങ്ങി സാധാരണ നിലയിലെത്തിയെന്നു കരുതിയിരിക്കവേ ഒരാഴ്ച മുന്പു പനി വന്നതിനെത്തുടര്ന്നു ചികിത്സ തേടിയ സിയയ്ക്ക് നാലു ദിവസം മുന്പാണു പേവിഷബാധ സ്ഥിരീകരിച്ചത്.
